1 Samuel 23

Devìt ɨ bœ̀sɨ̀ ghelɨ Kelà

¹À n-læ meyn nà ghɨ achi a li-a wùl ɨ gvi fèʼtɨ̀ sɨ̂ Devìt na ghelɨ Fìlisìyà nɨn nû ghelɨ Kelà beʼì lû nɨ̀ àsaŋ a sɨ a ɨlwèʼ ghè a ghɨ n-leŋ ateyn. ²Devìt ɨ bɨf sɨ̂ Fɨyini fɨ na, “Mà ndu nù ghelɨ Fìlisìyà ghèyn a?” Bôbo bèynsɨ̀ ɨ bè na, “Ndu nu àŋena ɨ bœ̀sɨ̀ ghelɨ Kelà.” ³Mɨtì ghelɨ Devìt ɨ bè sɨ̂ ŋweyn na, “Ghesɨ̀nà ti kæ nà ghɨ afêyn a Judà faynà a yi na ghɨ ti-a ɨlvɨ ta ghesɨ̀nà ndù sɨ nu ghelɨ Fìlisìya a Kelà a?”

⁴Devìt ɨ fi bɨf sɨ̂ Bôbo na yì ni gha? Bôbo bè sɨ̂ ŋweyn na, “Ndù a Kelà bòm ta mɨ n-fu ghelɨ Fìlisìyà a wa awu.” ⁵Devìt ɨ lù ŋêyn ghelɨ ŋweyn ɨ ndù a Kelà ɨ nù ghelɨ Fìlisìyà ɨ bèʼi lù nɨ̀ nyamsɨ àŋenasɨ. Wù n-læ meyn zuetɨ ghelɨ Fìlisìyà nô sɨ idvɨ̀ ɨ bœ̀sɨ̀ ghelɨ Kelà. ⁶À nà n-ghɨ tì ma Abiyatà ɨ wâyn Ahimelèk vzɨ̀ nɨ̀n læ meyn se sɨ leʼ sɨ ndù a ngùŋ nɨ̀ Devìt a Kelà, ɨ li àghaŋsɨ a ngàŋ ndô Fɨyini.

Sôl ɨ nyɨŋ ibàm nɨ̀ Devìt

⁷Ghɨ fèʼtɨ sɨ̂ Sôl na Devìt ndu meyn a Kelà wu bè na, “À ti n-ghɨ na Fɨyini fɨ fu meyn ŋweyn a ma awu bòm ta wù zɨ meyn fò ngêŋ ŋweyn a ntèʼ yi kelɨ mbàyn ghɨ fô àchfɨ̂ ateyn.” ⁸Ta wù bè tî ɨ jàŋtɨ̀ ghelɨ iwoŋ nɨ̀n ŋweyn nô ghɨ̀ jɨ̀m na àŋena ndu ɨ jɨ̀ŋ kal Devìt ŋêyn ghelɨ ŋweyn a Kelà.

⁹Devìt ɨ yvɨ nô mɨ ɨlvɨ gha na Sôl nɨ̀n baʼtɨ̂ sɨ nu ŋweyn, wu bè sɨ̂ Abiyatà ɨ ngàŋ ndô Fɨyini na wù gvi nɨ̀ àghaŋsɨ kì. ¹⁰Devìt ɨ jèm sɨ̂ Fɨyini fɨ ɨ bè na, “O Bôbo Fɨyini fɨ ghelɨ Isìlæ̀, mà wul ɨ̀ felɨnɨ nɨ̀ và yvɨ meyn samoʼ na Sôl nɨ̀n baʼtɨ̂ sɨ gvì sɨ bebsɨ ntèʼ Kelà yèyn bòm mà. ¹¹A ghelɨ ntèʼ Kelà ghèyn ti n-ghalɨ mà fù sɨ̂ Sôl a? A Sôl ti n-gvi-à kɨ̀ ighel ta wul ɨ̀ felɨnɨ nɨ̀ và yvɨ̀-a? O Bôbo Fɨyini fɨ ghelɨ Isìlæ̀, fèʼtɨ sɨ̂ wùl ɨ̀fèlɨnɨ nɨ̀ và.” Bôbo bè na, “Wu n-gvî-à.”

¹²Devìt ɨ fi kumtɨ bɨf nâ, “Ba à ti n-ghɨ na Ghelɨ Kelà ghèyn nɨn ghalɨ ghesɨ̀ ghelɨ̀ ghem fù sɨ̂ Sôl ma?” Bôbo Fɨyini ɨ bè na, “Àŋena nɨn fu-a.”

¹³Bôbo ɨ bè tì Devìt ɨ fvɨ̀ sɨ a Kelà ŋêyn ghelɨ ŋweyn ghɨ chem ndû ighɨ ntufa ɨ faŋ nà ndû kɨ alêʼ nɨ̀ àleʼ à. A nà ghɨ ta ghɨ fèʼtɨ̀ sɨ̂ Sôl na Devìt leʼ meyn fvɨ̀ sɨ a Kelà wu faŋ tɨ̀ fì ndù afu.

¹⁴Wù n-læ meyn chi ɨlwèʼ ɨ leyntɨnɨ a nse ìyum ɨ fi ndù ɨ chi a Zîf ilaʼi kfɨynsɨ a nse ìyum. Sôl ɨ nà kɨŋ Devìt kɨ̀ achi nɨ̀ achi a mɨtì Fɨyini fɨ faŋ tɨ visi na Sôl yeyn ŋweyn.

¹⁵Devìt ɨ nà bu ghɨ kɨ a Holès a nse ìyum a Zîf ɨ yvɨ na Sôl gvi meyn nà kɨŋ ŋweyn sɨ zue. ¹⁶Jònatàn ɨ wâyn Sôl ɨ ndu yeyn Devìt a ntèʼ Holès ɨ tebtɨ ŋweyn na wù na yeʼtɨ̂ kɨ ɨwùyn nɨ̀ Fɨyini fɨ. ¹⁷Wu n-bè sɨ̂ ŋweyn na, “Ka wà na faynà. Bò wom nɨn kùm wì awu a wa ɨwùyn. Wà na ghɨ fòyn Isìlæ̀, ma ghɨ ànkùmtɨ̀ sɨ̂ và. Nô bò wom Sôl nɨn kya tèyn.” ¹⁸Àŋena ghɨ̀bò ɨ yɨ mɨkâyn asɨ nɨ̀ Bôbo. Jònatàn ɨ lu kfa mɨtì Devìt ɨ faŋ kɨ a Holès.

¹⁹Ghelɨ Zîf ɨ ndu yeyn Sôl a Gibìyà ɨ bè sɨ̂ ŋweyn na, “Wà n-kya na Devìt nɨn leytɨ̀ kal kɨ a ghès a ngùŋ a Holès a? Wù n-chî a kfɨyn Hakilà isas i Jeshimòn. ²⁰Ghès nɨn chwotɨ̂ a mbæ̀ na yi na boynɨ̂-à wa gvì nô mɨ ɨlvɨ gha ta wà n-kôŋ ghèsɨ̀ ghal ŋweyn fù sɨ̂ và.”

²¹Sôl ɨ bèynsɨ̀ ɨ bè sɨ̂ àŋena na, “Bôbo nɨn boysɨ̂ zɨ̀ bòm ikfâʼtɨ̀ zɨ̀ a yi n-kelɨ sɨ̂ mà. ²²Yì kasi kfa ndù tòʼ bɨbtɨ àwo kûm ŋweyn. Yì bɨbtɨ ɨ̀ yvɨ alêʼ kì a wù nî wu na nyaŋsɨ̀ ndû ateyn, fì yvɨ na à yèyn nda ŋweyn afu a. Wù n-ghɨ tì ma ghɨ feʼtɨ meyn sɨ̂ mà na wù n-kuŋlɨ̂-à. ²³Yì faytɨ bɨ̀btɨ ɨ̀lwêʼ vzɨ̂ a wù nî wu nà lêytɨ̀ ateyn nô ɨ̀ jɨ̀m. Yi bɨbtɨ̀ ɨ̀ yvɨ yi gvi fèʼtɨ̀ sɨ̂ mà ta ka ghesɨ̀nà ndu kɨ̀ amoʼ. Wù kæ sɨ nà ghɨ nô mɨ alèʼ à kà afu a mà ghal ŋweyn kôŋ wu fi nì mɨ ghà.”

²⁴Wu taŋi tì àŋena lù sɨ a ŋweyn asɨ ɨ ndù a Zîf. A nà n-ghɨ tì Devìt ŋêyn ghelɨ ŋweyn ɨ ghɨ a nse ìyum a ntèʼ Màwûn ibal ili isas Jeshimòn. ²⁵Sôl ŋêyn ghelɨ iwoŋ nɨ̀ ŋweyn ɨ lu ndù sɨ kɨŋ Devìt. Ghɨ fèʼtɨ̀ sɨ̂ Devìt nô mɨ ɨlvɨ gha wu lù ɨ ndu lèytɨ̀ a iwu ili a nse ìyum a ntèʼ Màwûn. Sôl ɨ yvɨ na wù n-ghɨ afu ɨ jùmtɨ ndù nɨ̀ ŋweyn.

²⁶Sôl nà n-jêl abàs a kfɨyn a li-a, Devìt ŋêyn ghelɨ ŋweyn ɨ jêl ateyn nɨ a li-a fɨlɨ̂ leʼ ndû nɨ̀ Sôl. A nà sɨ ghɨ ta Sôl ŋêyn ghelɨ iwoŋ nɨ̀ ŋweyn jèl nà sɨ baʼsɨ gvî sɨ̂ Devìt ŋêyn ghelɨ ŋweyn sɨ ghaytɨ àŋena, ²⁷kɨ̀ têyn wùl ɨ gvi bè sɨ̂ Sôl na, “Kasi wa nyɨŋ kfâ! Ghelɨ Fìlisìyà zɨ meyn nɨ̀ ìnû-ì ilaʼ.” ²⁸Nô mɨ ɨlvɨ gha Sôl ɨ faŋ tɨ̀ fì nyɨŋ ibàm nɨ̀ Devìt ɨ kasi kfa sɨ nu ghelɨ Fìlisìyà. À ti iwo zɨ̀ a ghɨ n-toŋtɨ alêʼ nâ kì na Sèla Hamalekòt. ²⁹Devìt ɨ lù sɨ afu ɨ ndu nà leytɨ̀ chî a En Gedì.