1 Samuel 2

¹Hàna nɨn jem meyn sɨ̂ Bôbo ɨ bè na,

“Atem à kema nɨn saŋlɨ̂ sɨ̂ và a Bôbo Fɨyini,

Ma tɨm meyn yɨ sɨ adyaʼ nɨ̀ và a Bôbo.”

Mà sɨ kelɨ ìwo sɨ bè sɨ̂ mbàynɨ̀ semsɨ lvɨ̂yn.

Mɨ n-saŋlɨ-à bòm ta wà lìsì meyn ìwumi sɨ a ma atu.

²Nô wùl ɨ̀ nɨn layn wi ta vâ a Bôbo,

nô wul ɨ̀lvì ɨ ghɨ wi ta vâ.

Nô wùl ɨ nɨ̀n tôʼnɨ̀ wì ta Bôbo ɨ̀ wes.

³Ka yì na koʼsɨ̂ ɨ̀wuyn,

kolî mɨ na gha be-à,

bòm ta Bô nɨn ghɨ Fɨyini, kya nô àwo à jɨ̀m kì a ghelɨ nɨn nî,

ghɨ sɨ saʼ àŋena sɨ awo nâ ghàyn nô à jɨ̀m.

⁴Bôbo bebsɨ meyn mɨ̀nchya mɨ̀ ghelɨ iwòŋ ghɨ to,

mɨtì nì na ghelɨ ghɨ bolɨ na tôʼ to kɨ to.

⁵Ghelɨ ghì a ghɨ tî nà kelɨ ɨ̀fwo ɨ yɨnɨ, yɨ kula bu fì kelɨ wi afo sɨ yɨ

mɨtì ɨghî a ghɨ tî nà kelɨ wi sɨ yɨ ɨ yɨ duʼlɨ-à.

Nô mɨ àkàynà sɨ kelɨ woyn kɨ̀ sɨ idvɨ̀,

mɨtì ɨvzɨ̂ a wù tî nà kelɨ woyn ɨ koynsɨ̂ dzɨ a.

⁶Bô Fɨyini nɨn nî na ghelɨ kfɨtɨ fi nî na ghɨ na chi-a.

Wù n-tum ghelɨ ghɨli a tɨ̂sè mɨtì kasi lâysɨ̀ ghɨli sɨ ikfɨ.

⁷Bôbo nɨn nî ghelɨ ghɨli na ghɨ na fɨfa, fu ìghaʼ sɨ ghɨli.

Wù n-suʼsɨ̂ ghɨli a nse, lâysɨ̀ ghɨli iyvɨ.

⁸Wù n-fɨsɨ̀ ghelɨ ghɨ fɨfâ sɨ àŋena ngeʼsɨ,

wu nì na àŋena na dêŋsɨ̀ duʼ ɨlwèʼ ɨ koʼnɨnɨ bòm ta mbzɨ yèyn nɨ̀n kelɨ Bôbo, ma wù lem meyn dzɨ zɨ̀ a ka yì na jelɨ̀ ateyn.

⁹Wù n-tôʼnɨ̀ nɨ̀ (kinî) ghelɨ ŋweyn,

mɨtì ghɨ sɨ nì na ghelɨ ghɨ bɨ kfɨtɨ abe a fɨmnɨ-a.

Yi n-ghɨ tèyn bòm ta wùl kàʼ wù bû tɨm yɨ kɨ bòm ta wù n-kelɨ àdyaʼ.

¹⁰Bôbo nɨn sâytɨ̀ mbàynɨ̀ sɨ ŋweyn kɨ̀ isàʼ isàʼ,

wù n-byal ta ivɨ i myaynɨ-i atu nɨ̀ àŋena iyvɨ.

Bôbo nɨn saʼ kɨ tɨ̀ghaŋ tɨ mbzɨ tɨ̀ jɨ̀m.

Wù n-fu àdyàʼ sɨ̂ fòyn,

fî fu kɨmɨ sɨ̂ wùl vzɨ̀ a wù choʼ meyn lèm sɨ a fòyn.

¹¹Hàna ɨ jèm ɨ mèsì ŋêyn lum ŋweyn Elkanà ɨ kasi kfa ndù sɨ a ntèʼ Lamà, mɨtì Samwèl ɨ faŋ ɨ nà sɨ gâmtɨ̀ Eli felɨ̀ sɨ̂ Fɨyini fɨ.

¹²A nà n-ghɨ tì woyn Eli ghɨ kɨ nô woyn ghɨ bɨ, fâyn wi Fɨyini. ¹³Àŋena nà n-ghɨ ma ghɨ lem meyn na wùl nɨ̀n gvî fu ìfu i ŋweyn nɨ̀ nyàm, ghɨ se sɨ kfè, wùl ɨ̀ felɨnɨ nɨ̀ ngàŋ ndô Fɨyini ɨ gvì ɨ fvɨ̀sɨ̀ kɨ fɨsɨ ìlì. A nà n-ghɨ tì wù se sɨ gvì wu gvì nɨ̀ àntàs achuʼnɨ-a, kɨ kelɨ àsoŋ à tal sɨ chuʼ sɨ fvɨ̀sɨ nyam àteyn a ntòyn. ¹⁴Wù nà gvî tì nyàm zɨ̀ ɨ bu selâ kɨ sèla ichɨ wu bɨm tuŋ chuʼ kɨ chuʼ, à fvɨ̂ mɨ àlêʼ a nyâm à kà, wu lem kɨ na à sɨ ghɨ aki-a. À ti kɨ̀ ta àŋena nà n-nî sɨ̂ woyn Isìlæ̀ nô ghɨ̀ jɨ̀m ɨlvɨ ta àŋena kòʼ a Shilò ɨ̀ fu ifu i àŋena. ¹⁵À nà n-gvî mɨ ɨlvɨ ta ghɨ bu duʼ tɨ̀ nyòʼ alêʼ iso i nyâm, a wùl ɨ̀ fèlɨnɨ nɨ̀ ngàŋ ndô Fɨyini gvi ɨ̀ bè na ghɨ fu njwò iku ta ka ghɨ nyoʼ nyoʼ sɨ̂ ngàŋ ndô Fɨyini wù kfɨl bòm ta wu n-fsɨ wi nyam ìkfenɨ a bu kɨ iku.

¹⁶A wùl ɨ̀ vzɨ̀ a wù n-naŋsɨ iwo ifu nâ zɨ̀ be na, “visi ghɨ nyoʼ mèsì ìso sɨ̂ Fɨyini fɨ jæ ta ka wà li nô mɨ àlêʼ a njwò à kà ta wà n-kôŋ.” A wùl ɨ̀ fèlɨnɨ nɨ̀ ngàŋ ndô Fɨyini nâ zɨ̀ fî bè kɨ̀ na, “ɨ̀ngaŋ fu nyam àteyn sɨ̂ mà kɨ̀ lvɨ̂yn, a bu tì a mà fsɨ sɨ adyaʼ.”

¹⁷Mbɨsɨ woyn Eli nâ sìsɨ̀ ɨ nà sɨ bem kɨ tèyn sɨ̂ Bôbo bòm ta àŋena nà koli mɨ ghà, nî kɨ ni nɨ̀ ìfu i Bôbo i.

¹⁸A nà n-ghɨ tì, Samwèl ɨ felɨ̀ sɨ̂ Bôbo. Wù nà n-bu ghɨ kɨ wayndà mɨtì se sɨ fèl wu màʼ ndzɨsɨ sɨ ghɨ kɨ ta ndzɨsɨ ngàŋsɨ ndô Fɨyini. ¹⁹A na n-ghɨ mɨ a bêŋ ì kà Hàna tas ɨ fɨ̀ndzɨytɨ̂,wu ndu fu sɨ̂ Samwèl ɨlvɨ ta ŋêyn lûm ŋweyn nɨn n-koʼ sɨ fu ifu ɨchfɨ bêŋ. ²⁰Àŋena nà n-koʼ a Shilò nô mɨ ɨlvɨ gha, Eli jèm na Bôbo boysɨ Elkanà ŋêyn wî ŋweyn. Wù nà n-nî wu bè na, “Bôbo nɨn fu woyn sɨ̂ và toynɨ̂ a wul ɨ wi afêyn bòm ìjêm i ŋweyn zɨ̀-ì a wù tî jèm sɨ̂ Bôbo.” Eli jêm tì nô mɨ ɨlvɨ gha àŋena kasi kfa. ²¹Bôbo boysɨ Hàna wu fi bzɨ kfeynsɨ woyn woyn ghɨ lûmnɨ̀ ghɨli ghɨ̀ tal nɨ̀ woyn ghɨki ghɨ̀bò. A nà n-ghɨ tì Samwèl ɨ faytɨ̂ lemâ kɨ lema nî kɨ ìfêl i Bôbo.

²²Eli nà n-sɨ ghɨ ma wù lema meyn nô a jûŋ, yvɨ kɨ yvɨ awo kì a woyn ŋweyn n-nî sɨ̂ ghelɨ Isìlæ̀ fî yvɨ ta àŋena nɨn chi nɨ̀ ghɨ̀kì ghî a ghɨ n-felɨ̀ a ɨchfɨ fɨndo nɨ̀ Bôbo. ²³Eli bɨf sɨ̂ woyn ŋweyn na, “bòm ghà ta yi n-nî tɨ̀nkì tɨ awo tèyntɨ̀-a? Mɨ n-yvɨ àwo a bɨ-a nɨ̀ zɨ̀ kɨ̀ sɨ̂ ghelɨ ghɨ̀ jɨ̀m. ²⁴Ɨ̀ngaŋ a woyn ghem. Ka yì fî mòm. Awo kì a mɨ n-yvɨ ta ghelɨ Bôbo nɨn bê kûm zɨ̀ nɨn jofɨ̀ wì. ²⁵À n-gvi ɨlvɨ ta wùl ɨ̀ nì iwo i bzɨ-i sɨ̂ wùl, a na ghɨ ma Bôbo kàʼ a wù timi sɨ gàmtɨ̀ sɨ faytɨ iwo ateyn. Mɨtì ma wùl kæ nì iwo i bzɨ-i sɨ̂ Bôbo wùl bû nà fî ghɨ sɨ gàmtɨ ŋweyn nô sakos.” Wu n-læ taŋi mɨ tì woyn ateyn ɨ faŋ tɨ̀ yvɨ̀ itaŋi i bò àŋena. Yi nà n-ghɨ tèyn bòm ta Bôbo nà sɨ ghɨ ma wù choʼnɨ meyn sɨ zuetɨ àŋena, àŋena nà sɨ ghɨ ma ghɨ kàʼ ghɨ bû fì yvɨ bò àŋena.

²⁶Samwèl ɨ nà lêmâ koʼ kɨ nô a jûŋ itof i ŋweyn i tôʼ lemâ ndû kɨ asɨ. Bôbo Fɨyini ɨ nà kôŋ ŋweyn, nô ghelɨ ɨ boŋ kôŋ à.

Ngeʼ zɨ̀ a ka yì læ̂ kòli Eli nɨ̀ isas i ndo nɨ̀ ŋweyn i

²⁷À nà n-ghɨ achi a li-a nfèʼtɨ̀ ighaʼnɨ ì lì ɨ gvì ɨ làʼì ntum sɨ Eli ma yì lù sɨ̂ Bôbo Fɨyini ɨ bè na, “Mɨ n-læ meyn dyeyn baynsɨ ngêŋ yem sɨ̂ ghɨ̀bo ɨ ghya ɨtuʼ ta àŋena nà n-felɨ akôs sɨ̂ Felò ilaʼ i Ijìb. ²⁸Mɨ n-læ meyn choʼ bò bò vâ Alòyn antêynɨ̀ asas a ndosɨ nɨ̀ ghelɨ Isìlæ̀ nô à jɨ̀m na wù na ghɨ nfèʼtɨ̀ yem, fu tɨ̀fu atû àbaŋ ifu nɨ̀ mà fî nyôʼ ìleŋ sɨ̂ mà, mâʼ ndzɨsɨ nfèʼtɨ̀sɨ̀ ɨlvɨ ta wù n-felɨ̀ sɨ̂ mà. Mɨ n-læ meyn be kɨmɨ sɨ̂ ghɨ̀bò ɨ ghya kɨ̀ sɨ zɨ̀tɨ̀ a Alòyn sɨ ndù asɨ na ghelɨ Isìlæ̀ na gvî fu nyamsɨ sɨ a tɨ̂fu sɨ̂ mà, ghɨ sɨ, ɨ̀ se sɨ nyòʼ atû àbaŋ ifu, àŋena nà lî ɨ̀lwêʼ ɨlvɨ ateyn kfɨl a. ²⁹Bòm ghà ta asɨ à ki-a nɨn fvɨ̂ a tɨfu ghè a ghelɨ nɨn fu sɨ̂ mà a? Bòm ghà ta iwo i woyn ghya i nɨn to sɨ̂ và tèyn chwô ìwo ì yemi a? Ba zɨ̂ àŋena nɨn yɨ kɨ tɨ̀fu nâ tìtɨ̀ a ghelɨ Isìlæ̀ nɨn gvî fu sɨ̂ mà têyn, ghaʼlɨ-a?”

³⁰À ti iwo zɨ̀ a yi nì Bôbo Fɨyini fɨ Isìlæ̀ fɨ bê na, “Mɨ n-læ meyn chfɨ̀nɨ̀ na ghelɨ isas i ndo nɨ̀ bò vâ nɨ̀ ghelɨ ndo nɨ̀ và læ̀ nà felɨ̀ kɨ sɨ̂ mà, mɨtì lvɨ̂yn ma na bê na yi na bu fì ghɨ wi tî.” Mà na kôŋ kɨ ghelɨ ghì a ghɨ n-koʼsɨ ma, mɨtì bâyn ghelɨ ghì a ghɨ n-kesɨ ma. ³¹Ɨlvɨ nɨn gvî-à ta ka mà teyn isas i ndo nɨ̀ và a yi na bu felɨ̀ wì sɨ̂ mà. Nô ghelɨ isas i ndo nɨ̀ và ghɨ̀ jɨ̀m nɨn læ̀ kfɨtɨ kɨ nɨ̀ dzɨ̀. Wùl ɨlwema læ̀ nà bu ghɨ wi a wa isas i ndo. ³²Wà læ̀ nà koynsɨ̂ ki kɨ ki ta mɨ n-boysɨ ghelɨ Isìlæ̀ wa nà gheʼà, mɨtì wul ɨlwema bu fì ghɨ wi sɨ læ̀ sɨ nà fî ghɨ a yi isas i ndo nô ta ka ghɨ̀ læ̂ ghɨ̀. ³³Mà kæ visi mɨ visi wul ìsas i ndo nɨ̀ và na wù na felɨ̀ sɨ̂ mà atû àbaŋ ifu, a wù fef nà bu fì kelɨ wi mɨ àdyaʼ. Nô ghelɨ isas i ndo nɨ̀ và ghɨ̀ jɨ̀m læ̀ kfɨtɨ̂ kɨ nɨ̀ dzɨ̀.

³⁴Iwo zɨ̀ a ka yi gayn sɨ̂ woyn ghya, Ofɨ̀nì nɨ̀ Finighàs na ghɨ sɨ a nchwæ sɨ̂ và. Àŋena læ̀ kfɨtɨ kɨ achi àmòʼ ghɨ̀ jɨ̀m, ³⁵a mà choʼ nfèʼtɨ̀ yem ì jùŋ a wù na nî nô mɨ ghà kɨ ighel ta mɨ n-kɨŋ. Mɨ nì lêm ghelɨ isas i ndo nɨ̀ ŋweyn sɨ a ma nfèʼtɨ̀sɨ̀ kɨ̀ sɨ a mɨlvɨ ɨ̀n jɨ̀m. ³⁶Mɨ nì nî tèyn, a nô mɨ ndà ta wù faŋ a isas i ndo nɨ̀ và na ngvɨmlɨ̂ kɨ ngvɨmlɨ ŋweyn. Wùl sɨ ateyn læ̀ nà loyn fɨ̀kwôtɨ̀ kèsa fɨfôlɨ̀ tèyn sɨ ŋweyn sɨ yɨ bê na, “Mɨ n-chwotɨ̂ na wà li ma sɨ a nfèʼtɨ̀ î lì ta ka mà na kelɨ kɨ nô àfo sɨ yɨ.”