1 Samuel 16

Samuel ɨ lèm Devìt sɨ a fòyn

¹À nà n-ghɨ achi a li-a Bôbo bè sɨ̂ Samwèl na, “Wa ti n-dzɨ̀ Sôl ndù chèm wo ma bu lî wì ŋweyn sɨ a Fòyn ghelɨ Isìlæ̀ a? Lì bom ndoŋ nɨ̀ và ɨ we mɨ̀vɨl mɨ̀ olìf ateyn ɨ̀ ndù a Betɨ̀làhêm, a ndo nɨ̀ Jesì. Mà sɨ ghɨ ma ma choʼ meyn wayn ŋweyn ɨ̀lvì na wù li alêʼ a Sôl sɨ a fòyn.”

²Mɨtì Samwèl ɨ tuynsɨ ɨ bè na, “Yi n-boynɨ̂ wì ta ka mà ndu. Mà kæ sɨ mòm Sôl yvɨ a wù zue ma.” Bôbo ɨ bè sɨ̂ ŋweyn na, “Wà se sɨ ndù wa lì wayn nyàm iki. Wà ndû wa be kɨ sɨ̂ ghelɨ afu na wà gvì a Betɨ̀làhêm sɨ fu ifu sɨ̂ Bôbo. ³Wà bê tì wa jàŋ Jesì alèʼ ifu nâ ghè a ka mà dyeyn bàynsɨ ìwo zɨ̀-ì sɨ̂ và a ka wà ni. Mɨ n-fèʼtɨ̀ wul vzɨ̀ sɨ̂ và a mà chòʼ a wà yisi ŋweyn sɨ a fòyn.”

⁴Samwèl ɨ ni kɨ ighel ta Bôbo bè. A nà ghɨ ta wù chèm a Betɨ̀làhêm chyeʼsɨ fvɨ ndù sɨ fsɨsɨ ŋweyn ɨ nà faynà ɨ bɨf sɨ̂ ŋweyn nâ, “A wà ti n-gvî kɨ nô nɨ̀ mbôynɨ̀-à?”

⁵Samwèl ɨ bèynsɨ̀ sɨ̂ àŋena na, “Mà gvì kɨ̀ nô nɨ̀ mbôynɨ̀, sɨ fu ifu sɨ̂ Bôbo. Yì baʼtɨ ngêŋ sisɨ ɨ̀ gvì ghesɨ̀nà ndu alèʼ ifu nâ ghàyn.” Mɨ ɨlvɨ gha Samwèl ɨ fu Jesì ŋêyn woyn ŋweyn sɨ̂ Fɨyini fɨ ɨ boŋ làʼì àŋena alèʼ ifu nâ ghè.

⁶A nà sɨ ghɨ ta àŋena ndù meyn alèʼ ifu nâ ghè, Samwèl ɨ yeyn Elìyàb, ɨ wâyn Jesì ɨlwema wu ti afu ɨ nà sɨ kfâʼ na, à n-ghɨ ŋweyn vzɨ̀ a Bôbo chòʼ meyn sɨ a fòyn.

⁷Mɨtì Bôbo ɨ bè sɨ̂ Samwèl na, “Ka wa n-ki kɨ̀ ta wù n-ghɨ ɨkuŋ fî njetɨ̂-à. Ma bû chòʼ ŋweyn. Mɨ n-ki wi wul a dzɨ afî a wùl mɨ̀sòŋ nɨn ki ateyn. Ghelɨ nɨn ki wul ikèʼ mɨtì ma ki dzɨ atem.”

⁸Jesì ɨ jàŋ wâyn ŋweyn Àbinadàb ɨ bè sɨ̂ ŋweyn na wù ghaynɨ ɨ̀ chwò asɨ nɨ̀ Samwèl. Mɨtì Samwèl ɨ bè na, “Bôbo bû chò ɨwêyn.” ⁹Jesì ɨ fi bè Shamà ghaynɨ ɨ chwò asɨ nɨ̀ Samwèl mɨtì Samwèl ɨ fi be kɨ na, “Bôbo bû chòʼ nô mɨ ɨwêyn.” ¹⁰Jesì nɨ̀n be meyn nô woyn ŋweyn ghɨ̀ jɨ̀m nsòmbo ta ghɨ nà n-ghɨ afu ɨ jèl ɨ chwò asɨ nɨ̀ Samwèl mɨtì Samwèl ɨ be kɨ na, “Bôbo bû chòʼ nô wul ɨ̀mòʼ a àŋena antêynɨ̀.” ¹¹Wu bè tì ɨ kæ bɨf sɨ̂ Jesì nâ, “A ti mæ̀ kɨ̀ woyn ghya teyn a?” Jesì ɨ bè na, “Àngòʼsɨ̀-à bu ghɨ mɨtì kinî bzɨsɨ ɨtwaʼ.” Samwèl ɨ bè sɨ̂ Jesì na, “Tum ghɨ ndu jàŋ ŋweyn. Ghesɨ̀nà nɨn zɨ̂tɨ̀ wì sɨ yɨ a bu kɨ na wù gvi meyn.”

¹²Jesì ɨ tum wul na wù ndu lì gvì nɨ̀ àngòʼsɨ̀ a wayn nɨ̀ ŋweyn a. Wayn àteyn nà n-ghɨ kɨ nô ɨ̀kuŋ, bôʼsɨ̀ jôf kɨ tèyn, ikêʼ i ŋweyn i lanî-à. Wu gvì mɨ ɨlvɨ gha Bôbo ɨ bè sɨ̂ Samwèl na, “À n-ghɨ ŋweyn vzɨ̀ a mà chòʼ têyn. Yisi ŋweyn sɨ a fòyn.”

¹³Samwèl ɨ ni kɨ ighel ta Bôbo bè ɨ lì bom ndoŋ zɨ̀ nɨ̀ mɨ̀vɨ̂l mzɨ̀ ateyn ɨ sfɨ̀s atu nɨ̀ àngòʼsɨ̀ a wayn nɨ̀ Jesì kì kɨ̀ asɨ nɨ̀ woynà ŋweyn. Kɨ̀ sɨ zɨ̀tɨ̀ ɨlvɨ nâ ghè sɨ ndù asɨ Ayvɨs a Bôbo nà sɨ tisɨ̂ Devìt. A nà sɨ ghɨ ta Samwèl fù meyn mèsì ìfu ateyn nô mɨ ɨlvɨ gha ɨ kasi ndù a ntèʼ Lamà.

Devìt ɨ nà felɨ̀ sɨ̂ Sôl.

¹⁴Ayvɨs a Bôbo nà n-sɨ ghɨ ma kɨ visi meyn Sôl, Bôbo tum àyvɨs a bɨ-a kɨ nà fu ngeʼ sɨ̂ ŋweyn.

¹⁵Ghelɨ ghɨ felɨnɨ nɨ̀ Sôl ɨ bè sɨ̂ ŋweyn na, “Yi n-ghɨ samoʼ na Fɨyini fɨ tum meyn àyvɨs a bɨ-a kɨ na fu ngeʼ sɨ̂ và. ¹⁶Visi a bô ghès kini wul wu faytɨ̂ kya sɨ buʼ iluŋ ta ka Ayvɨs a bɨ-a nâ kèynà na se sɨ fu ngeʼ sɨ̂ và wu nà buʼ ìluŋ yi kfɨmtɨ̂ và.”

¹⁷Sôl ɨ bè sɨ̂ ghelɨ ghɨ felɨnɨ nɨ̀ ŋweyn na, “Yì kini wul wu faytɨ̂ kya sɨ buʼ iluŋ ɨ̀ gvì nɨ̀ ŋweyn sɨ̂ mà.”

¹⁸Wùl ɨ̀ felɨnɨ nɨ̀ ŋweyn ɨ̀lvì ɨ bè na, “Mɨ n-kya wayn Jesì ɨwu Betɨ̀làhêm ɨ̀lvì a ghɨ kɨ nô ɨ̀ kuŋ kya sɨ buʼ iluŋ, kelɨ àtem ato a, itaŋi-i fî fom ɨchfɨ̀, tɨm ìghoŋ nô a jûŋ. Bôbo nɨn tisɨ̂ ŋweyn kɨ̀ awo afî a wù nî à jɨ̀m.”

¹⁹Sôl ɨ tum ghɨ ndu bè sɨ̂ Jesì na, “Tsɨynsɨ wâyn vâ vzɨ̀ sɨ̂ mà a wu n-kini bzɨsɨ sɨ̂ và tì ghɨ toŋtɨ na Devìt.” ²⁰Jesì ɨ lì njàkâs ɨ kul ɨfwo ɨ yɨnɨ sɨ a jɨm nɨ̀ nsàl mɨ̀lùʼ ma ghɨ fàytɨ nɨ̀ gvɨ̂ nyàm baʼsɨ̂ nɨ̀ wayn bzɨ ɨ tsɨynsɨ na wâyn ŋweyn Devìt ndu fù sɨ̂ fòyn Sôl.

²¹Devìt ɨ ndu yeyn Sôl ɨ nà sɨ ghɨ wul ɨ̀ fèlɨnɨ nɨ̀ ŋweyn. Sôl ɨ nà sɨ kôŋ Devìt nô sɨ a ŋaŋ ɨ choʼ na wù na ghɨ wul ɨ̀mòʼ antêynɨ̀ nɨ̀ ghelɨ ghì a ghɨ n-beʼì ɨfwo iwoŋ nɨ̀ ŋweyn. ²²Sôl ɨ fi tum ntum sɨ̂ Jesì ɨ bè na, “Mɨ n-saŋlɨ̂ nô sɨ a ŋaŋ kûm wâyn vâ Devìt. Visi wù faŋ nà felɨ̀ sɨ̂ mà.”

²³À nà n-nî a na ghɨ nô mɨ ɨlvɨ gha ta Ayvɨs a bɨ-a kì zɨ̀tɨ sɨ fu ngeʼ sɨ̂ Sôl, Devìt ɨ lì ìluŋ i ŋweyn ɨ nà buʼa, ɨ̀ se sɨ buʼ Ayvɨs a bɨ-a ateyn a visi Sôl wu nà sɨ ku kɨ nô a jûŋ.