1 Kings 19

Elajà ɨ leʼ Jezebèl

¹A nà ghɨ ta fòyn Ahàb kfa meyn, wu fèʼtɨ̀ sɨ̂ wî ŋweyn nô mɨ ghà ta Elajà nì, ɨ fèʼtɨ̀ ta wù zue nfèʼtɨ̀sɨ Bâl kɨ sɨ̀ jɨ̀m. ²Jezebèl ɨ tum ɨ bè sɨ̂ Elajà na, “À n-jofɨ̀ na mɨyini leŋ zuè ma ɨlvɨ ta à læ̀ nà ghɨ kɨmɨ aleŋ a lvɨ̂yn a libɨs kɨ̀ ta ma nî sɨ̂ và iwo zɨ̀ a wà nì sɨ̀ nfèʼtɨ̀ sɨ Bâlsɨ̀.”

³Elajà ɨ nà sɨ faynà na ghɨ n-zue ŋweyn ɨ lù ɨ leʼ ndù a ntèʼ Beshebà a ghɨ ntèʼ Judà ɨ lèm wul ɨ̀ felɨnɨ afu. ⁴Ɨ lù kɨ nìnyɨŋ ɨ jèl achi afɨ̂blɨ̀-à ɨ zɨ a nse iyum ɨ dùʼì isas i fɨ̂kàʼ fɨtelâfɨ̀. Wu dùʼì tì ɨ nà sɨ bè na, “Bôbo, izɨpì a mà nì meyn, yi kfeyn meyn. Ma na sɨ ghɨ lvɨ̂yn tèyn ma ma kfɨ meyn a yi na kwo jòf sɨ̂ mà. Ni mà kfɨ a Bôbo. Yi n-jôf na mà na ghɨ kɨmɨ ta ghɨ̀bo ghem, mɨ n-jôf chwô wi àŋena.” ⁵Ta wù tàŋi tî, ɨ suʼi nyɨ̀ŋì isas i fɨ̂kàʼ nâ ghè ɨ buni. Nchì Fɨyini ɨ gvì ɨ kùm ŋweyn ɨ bè na wù lali ɨ yɨ. ⁶Wu se sɨ ki sɨ kal a mbæ̀sɨ alèʼ ghè a wù nì nyɨ̀ŋsɨ̀ atu a ŋweyn ateyn ɨ yeyn ighef abayn nɨ̀ àtem a mu-a. Wu yɨ ɨ nvɨtɨ mu ɨ kasi nyìŋi.

⁷Nchì Fɨyini ɨ fi kasi gvì sɨ a ànkùmtɨ̀ ɨlvɨ ɨ yèm ŋweyn ɨ bè na, “Làli yɨ bòm ta wà n-kelɨ sɨ jèl nò sɨ a ŋaŋ.” ⁸Elajà ɨ làlì ɨ yɨ ɨ nyvɨtɨ mu. Ɨfwo ɨ yɨnɨ ɨ fu adyaʼ wu jèl sɨ a mɨchi mɨ̀vɨm ɨ̀n kæ̀ ɨ ndù a kfɨyn Sinàyn, ɨ kfɨyn i laynɨ. ⁹Ifô i ghɨ a kfɨyn afu, wu zɨ ɨ chi ateyn, kɨ̀ têyn, gyà Bôbo ɨ gvì sɨ̂ ŋweyn/kɨ̀ têyn wu yvɨ gyâ Bôbo ta yì gvì. Bôbo ɨ bɨf sɨ̂ ŋweyn na, “Wà n-nî ghà afêyn a Elajà.”

¹⁰Wu bèynsɨ̀ ɨ bè na, “Jèŋ nɨn yafɨ mà nô sɨ a ŋaŋ sɨ nà nî awo kì a Bôbo vzɨ̀ a wù n-kelɨ kɨ adyaʼ à jɨ̀m nɨn bê nô mɨ ta ghelɨ Isìlæ̀ bèyn meyn jɨm sɨ̂ mɨ̀kâyn mzɨ̀ a àŋena nɨn læ yɨ sɨ̂ và. Àŋena bɨytɨ meyn ɨ̀byaŋ ifu nɨ̀ và, ɨ̀ zuètɨ nfèʼtɨ̀ sɨ ghaʼnɨsɨ nɨ̀ và, à faŋ kɨ̀ ma, àŋena na sɨ kɨŋ sɨ zue ma lvɨ̂yn.” ¹¹Bôbo ɨ bè sɨ̂ ŋweyn na, “Fvɨ ndu timi a kfɨyn asɨ nɨ̀ Bôbo, Bôbo ɨ taŋi tì ɨ chwò.” Ta wù chwo, afyef ato-a ɨ chwò ma kɨ kaʼ a kɨ baytɨ kfɨyn baʼsɨ̂ nɨ̀ tɨ̀wutɨ mɨtì Bôbo ɨ ghɨ wi antèynɨ̀ àfyef nâ ghàyn. A nà ghɨ ta kɨ chwò mèsì, nse ɨ nà shɨŋa mɨtì Bôbo ɨ ghɨ wi ateyn. ¹²Nse ɨ shɨŋ mèsì, ɨvɨsɨ bali mɨtì Bôbo ɨ ghɨ wi ɨvɨs nâ ghè. Ɨvɨs ɨ bali mèsì, gyà ichɨmtɨnɨ ɨ fvɨ̀ yvɨtɨ̀-à fî boynɨ-à. ¹³Elajà ɨ yvɨ nô mɨ ɨlvɨ gha ɨ làysɨ̀ àghaŋsɨ a ŋweyn ɨ chɨl ikêʼ i ŋweyn ateyn ɨ fvɨ̀ ɨ timi ɨchfɨ̀ ifo nâ ghè. Ggyà àteyn ɨ gvì sɨ̂ ŋweyn ɨ bɨf na, “Wà n-nî ghà afêyna Elajà?”

¹⁴Wu bèynsɨ̀ ɨ bè na, “Jèŋ nɨn yaf ma nô sɨ a ŋaŋ sɨ na nî àwo kì a Bôbo vzɨ̀ a wùn n-kelɨ kɨ adyaʼ a jɨ̀m nɨn be, nô mɨ ta ghelɨ Isìlæ̀ bèyn meyn jɨm sɨ̂ mɨ̀kàyn mzɨ̀ a àŋena nɨn læ yɨ sɨ̂ và. Àŋena bɨytɨ meyn ɨ̀bwaŋ ifu nɨ̀ và, zuètɨ nfèʼtɨsɨ ghaʼnɨsɨ nɨ̀ và, à faŋ kɨ̀ ma. Àŋena na sɨ kɨŋ sɨ zue ma lvɨ̂yn.” ¹⁵Bôbo ɨ bè sɨ̂ ŋweyn na, “Lu kasi ndu a nse iyum a mbæ̀ Dàmaskùs ɨ zɨ ndù a ntèʼ ɨ yisi Hazàd sɨ a fòyn ilaʼ i Silìyà. ¹⁶Ɨ yisi Jehù ɨ wâyn Nimshì sɨ a fòyn Isìlæ̀ ɨ yisi Elishà ɨ wâyn Shafàt ma wù lù a ntèʼ Abel-Meholà. À nà ghɨ ŋweyn nyɨ ìsas nɨ̀ và ta nfèʼtɨ̀ ì ghaʼnɨ. ¹⁷À sœ̀ nò mɨ ndà sɨ kfɨ awu nɨ̀ Hazàd a wùl àteyn nɨn kfɨ awu nɨ̀ Jehù. A sœ mɨ ndà sɨ kfɨ awu nɨ̀ Jehù a wu n-kfɨ awu nɨ̀ Elishà. ¹⁸Yi n-gàyn mɨ tèyn a mà visi ghelɨ a Isìlæ̀ nkamsɨ nsòmbo a àŋena faŋ tɨ̀ kfɨ. Ghelɨ nâ ghèyn na ghɨ kɨ ìghɨ i àŋena nɨ̀ ìyvɨnɨ-i sɨ̂ mà, koʼsɨ̂ wi mɨ̀yìnì mɨ̀ Bâl sɨ nà ndû tɨm àlvɨ asɨ nɨ̀ ɨ̀mêyn ɨ fu chuʼ achfɨ̂ a àŋena ɨ̀nfwèʼsɨ̀ nâ ghàyn.

Bôbo choʼ Elishà sɨ a n-yɨ ìsas nɨ̀ Elajà

¹⁹Elajà ɨ lù ɨ se sɨ ndù ɨ yeyn Elishà ɨ wâyn Shafàt ma wù lì meyn nyamsɨ mbòloʼ, ɨ kul ɨ̀nbuŋ a mzɨ̀ nɨ̀ nseynsɨ sɨ nà felɨ̀ gveyn. Ɨmbuŋ ateyn ɨ nà ghɨ njvàsɨ̀ bò/ nyamsɨ̀ bò sɨ gùf àmbuŋ àmòʼ. Elajà ɨ chwo ndù ambùn a gyòʼsɨ̀ na afî a Elishà nà n-ghɨ ateyn ɨ lì àwaf a ŋweyn ɨ màʼ ɨwuyn nɨ̀ Elishà. ²⁰Elishà ɨ visi ìfêl zɨ̀ a wù nì a gvêyn ɨ nyɨŋ ndù ibàm nɨ̀ Elajà ɨ bè sɨ̂ ŋweyn na, “Visi mà ndu tòŋtɨ bò wom nɨ̀ nà wom ghesɨ̀và kæ lù. Elajà ɨ bè na, “Ndu toŋtɨ mɨtì ka n-lèsɨ̀ ìwo zɨ̀ a mà nì sɨ̀ và.”

²¹Elishà ɨ kasi gvì ɨ lì nyamsɨ felɨnɨ nâ sèynsɨ̀ ɨ sɨ, ɨ bàytɨ̀ ɨ̀mbùŋ ateyn vzɨ̀ sɨ ɨnkàʼ ɨ faytɨ ɨ̀vɨs ɨ kfè nyamsɨ ateyn ɨ fu sɨ̂ ghelɨ ghì a ŋêyn àŋena nà felà àŋena kfɨl. Wu lù ŋêyn Elajà ɨ nà sɨ ghɨ wul vzɨ̀ a wu n-gamtɨ ŋweyn.